Ambasada e Shteteve të Bashkuara të Amerikës në Prishtinë e ka uruar Kosovën me rastin e njohjes së Agjencisë së Kosovës për Akreditim si “autoritet akreditues” nga Këshilli për Akreditimin e Arsimit të Lartë (CHEA) në SHBA.

“Urime Kosovës për njohjen zyrtare të Agjencisë së saj të Akreditimit në Shtetet e Bashkuara të Amerikës nga Këshilli për Akreditimin e Arsimit të Lartë (CHEA), si ‘autoritet i njohur’ deri në vitin 2033. Kjo përbën një arritje të rëndësishme që konfirmon cilësinë institucionale, reformat e ndërmarra dhe rritjen e besimit ndërkombëtar në sistemin e arsimit të lartë të Kosovës”, thuhet në urimin e Ambasadës Amerikane, të publikuar në faqen zyrtare të Ambasadës në Facebook.

Urimi i Ambasadës Amerikane vjen pas pritjes zyrtare që iu bë në selinë e Ambasadës Kryetares së Këshillit Shtetëror të Cilësisë (KSHC), profesoreshës Hasnije Ilazi, dhe Drejtorit të Përgjithshëm të AKA-së, Naim Gashi.

Gjatë këtij takimi, drejtuesit e AKA-së e falënderuan Ambasadën Amerikane për përkrahjen e vazhdueshme në funksion të forcimit të pavarësisë institucionale dhe ngritjes së kapaciteteve profesionale të Agjencisë.