Këshilli Shtetëror i Cilësisë (KSHC) i Agjencisë së Kosovës për Akreditim (AKA), në mbledhjen e mbajtur më 30.06.2025, i ka miratuar Standardet e rishikuara të programeve të doktoratës dhe e ka miratuar Rregulloren e Rishikuar për Monitorim dhe Procedura Pas-akredituese.

Ky vendim erdhi pas një procesi gjithëpërfshirës të të gjithë hisedarëve të arsimit të lartë në Republikën e Kosovës.

Standardet e reja për vlerësimin e programeve të doktoratës janë rezultat i një analize pesëvjeçare që u realizua pas miratimit të standardeve fillestare në vitin 2020. Standardet e rishikuara janë strukturuar në shtatë fusha kryesore, duke përfshirë strukturën institucionale, kriteret e pranimit, përmbajtjen e programeve, mjedisin kërkimor, mbikëqyrjen, vlerësimin dhe rezultatet e kërkimit.

Rishikimi i këtyre standardeve është bërë me mbështetjen e Programit SHER, i cili financohet nga Agjencia Austriake për Zhvillim (ADA) dhe bashkë-financohet nga Ministria e Arsimit, Shkencës, Teknologjisë dhe Inovacionit, dhe zbatohet nga konsorciumi WUS Austria, ZSI dhe OeAD.

Ndërkohë, me qëllim të përforcimit të sistemit të sigurimit të cilësisë dhe rritjes së transparencës në arsimin e lartë, KSHC miratoi gjithashtu Rregulloren për Monitorim dhe Procedurat Pas-akredituese.

Kjo rregullore përcakton qartë se monitorimi do të zhvillohet të paktën një herë gjatë ciklit të akreditimit dhe mund të përfshijë vizita fizike apo vlerësim në distancë. Monitorimi përfshin vlerësimin e përmbushjes së kushteve të akreditimit nga institucionet e arsimit të lartë dhe verifikimin e ndryshimeve në stafin akademik, infrastrukturë, burime, si dhe mekanizmat e brendshëm të sigurimit të cilësisë.

Në kuadër të procedurave pas-akredituese, institucionet janë të obliguara të dorëzojnë një plan të zbatimit të rekomandimeve të ekspertëve ndërkombëtarë, i cili duhet të jetë i strukturuar, i dokumentuar dhe i afatizuar. Pas dërgimit të raportit të vetë-përmirësimit, AKA angazhon ekspertë ndërkombëtarë për të verifikuar përputhshmërinë me rekomandimet dhe për të përmbyllur ciklin e akreditimit.

Në mbledhjen e sotme KSHC i ka shqyrtuar edhe disa raportet të ekspertëve ndërkombëtarë të akreditimit dhe ka marrë vendime lidhur me to.