Më 19 maj 2025, Këshilli Shtetëror i Cilësisë (KShC) dhe menaxhmenti i Agjencisë së Kosovës për Akreditim (AKA) realizuan një vizitë zyrtare në të dy kampuset e Kolegjit Ndërkombëtar të Biznesit në Mitrovicë (IBCM), në jug dhe veri të qytetit.

Gjatë vizitës, përfaqësuesit e AKA-së zhvilluan takime me menaxhmentin e institucionit për të diskutuar sfidat dhe përparësitë në përmirësimin e cilësisë së arsimit të lartë.

Kryetarja e KShC-së, profesoresha Hasnije Ilazi, theksoi se këto vizita janë bërë tashmë pjesë e praktikës së rregullt të Këshillit, me qëllim të thellimit të bashkëpunimit dhe përfshirjes së drejtpërdrejtë të akterëve të arsimit të lartë në procesin e përmirësimit të cilësisë.

Në këtë kontekst, profesoresha Ilazi përgëzoi menaxhmentin e IBCM-së, stafin akademik dhe studentët për ndryshimin e statusit të institucionit, nga një institucion joprofitabil në një institucion publik. Ajo theksoi se ky transformim do të ndikojë pozitivisht në qëndrueshmërinë institucionale dhe financiare të kolegjit.

Nga ana e saj, Rektorja e IBCM-së, profesoresha Mihane Kerolli, falënderoi KShC-në për përkrahjen e vazhdueshme në përmirësimin e cilësisë së programeve dhe avancimin e procesit të internacionalizimit në arsimin e lartë në Kosovë.

Kolegj Ndërkombëtar i Biznesit në Mitrovicë (IBCM) është një institucion i akredituar që ofron programe akademike në fushat e biznesit, menaxhimit të mjedisit, teknologjisë së informacionit dhe shkencave shoqërore. Me një qasje të fokusuar në edukimin praktik dhe ndërkombëtar, IBCM ofron mësimdhënie në gjuhën angleze dhe diploma të dyfishta në bashkëpunim me universitete partnere nga Evropa.

IBCM numëron rreth 800 studentë aktivë nga të gjitha komunitetet në Kosovë dhe rajon, përfshirë studentë shqiptarë dhe serbë, duke kontribuar në ndërtimin e një shoqërie të barabartë, gjithëpërfshirëse dhe të orientuar drejt zhvillimit të qëndrueshëm.