Në punëtorinë e mbajtur më 28 maj 2025, Agjencia e Kosovës për Akreditim (AKA) ka miratuar Planin e Integritetit, i cili synon përmirësimin e funksionimit të Agjencisë përmes forcimit të përgjegjshmërisë institucionale, thjeshtimit të procedurave, rritjes së transparencës në vendimmarrje, kufizimit të autorizimeve diskrecionale, respektimit të parimeve etike dhe ndërtimit të një sistemi efikas të mbikëqyrjes së punonjësve.

Plani i miratuar adreson identifikimin dhe menaxhimin e rreziqeve të integritetit brenda funksioneve kyçe të AKA-së, duke përfshirë masa konkrete për parandalimin dhe minimizimin e tyre.

Dokumenti përfaqëson një qasje të strukturuar për ndërtimin dhe zhvillimin e kulturës së integritetit në institucion, ndërsa miratimi i tij shënon një hap thelbësor drejt themelimit të një sistemi të qëndrueshëm për menaxhimin e rreziqeve që mund të cënojnë integritetin institucional.

Qëllimi kryesor i Planit të Integritetit është përmirësimi i politikave, rregulloreve dhe praktikave të parandalimit të tejkalimit të kompetencave, si dhe forcimi i kapaciteteve institucionale për të qëndruar rezistent ndaj shkeljeve të parimeve të integritetit.

Dokumenti reflekton një vizion të qartë mbi mënyrën se si ndërtohet, zhvillohet dhe zbatohet integriteti në strukturat e AKA-së, duke përcaktuar mekanizmat dhe instrumentet efektive për arritjen e këtij qëllimi.

Në këtë drejtim, AKA ka ndërmarrë hapa të rëndësishëm drejt konsolidimit të kornizës rregullatore dhe operacionale, ndërsa miratimi i Planit të Integritetit përfaqëson një përpjekje strategjike për ngritjen e një sistemi të fuqishëm dhe gjithëpërfshirës për menaxhimin e integritetit institucional.

Shkarko Planin e Integritetit