Agjencia e Kosovës për Akreditim (AKA) ka miratuar Planin e zhvillimit profesional për stafin, në një punëtori të organizuar me fokus në forcimin e kapaciteteve profesionale, teknike dhe organizative për periudhën trevjeçare 2026–2028.

Ky plan strategjik synon rritjen e cilësisë së punës së stafit përmes zhvillimit të kompetencave profesionale, përdorimit të avancuar të platformave digjitale të AKA-së, fuqizimit të komunikimit profesional me institucionet e arsimit të lartë (IAL) si dhe harmonizimit të punës me standardet evropiane të sigurimit të cilësisë (ESG 2015).

Plani parasheh një sërë aktivitetesh, përfshirë punëtori të brendshme, trajnime profesionale, pjesëmarrje në konferenca dhe vizita studimore ndërkombëtare, trajnime praktike në përdorimin e platformës e-akreditimi, si dhe zhvillim të aftësive në analizën e të dhënave, raportim dhe menaxhim të proceseve të monitorimit.

Po ashtu, dokumenti përfshin aktivitete për certifikim në menaxhim dhe përfaqësim në ngjarje rajonale dhe ndërkombëtare të fushës së sigurimit të cilësisë.

Zbatimi i këtij plani pritet të kontribuojë në rritjen e efikasitetit dhe transparencës së procesit të monitorimit të IAL-ve, përmirësimin e cilësisë së raporteve të akreditimit, monitorimit dhe procedurave pas akredituese, si dhe në integrimin më të lartë të teknologjisë në proceset e punës së AKA-së.

Nëpërmjet këtij plani AKA synon të sigurojë që stafi i saj të jetë i përgatitur, kompetent dhe në përputhje me kërkesat bashkëkohore kombëtare dhe ndërkombëtare për sigurimin e cilësisë në arsimin e lartë.