Me rastin e njohjes së Agjencisë së Kosovës për Akreditim si autoritet akreditues nga Këshilli për Akreditimin e Arsimit të Lartë në Shtetet e Bashkuara të Amerikës (CHEA), Presidenti i CHEA-s, Nasser H. Paydar, përmes një video-mesazhi, e ka mirëpritur AKA-në në një komunitet ndërkombëtar në rritje, të përkushtuar ndaj avancimit të cilësisë akademike dhe nxitjes së mësimit të ndërsjellë ndërmjet kombeve dhe kulturave.

“Jemi krenarë që mirëpresim AKA-në në një komunitet ndërkombëtar në rritje, të përkushtuar ndaj avancimit të cilësisë akademike dhe nxitjes së mësimit të ndërsjellë ndërmjet kombeve dhe kulturave”, ka theksuar Presidenti i CHEA-s, Nasser H. Paydar.

Në video-mesazhin e tij drejtuar Agjencisë, Presidenti Paydar e ka cilësuar këtë arritje si një moment të rëndësishëm për sistemin e sigurimit të cilësisë në arsimin e lartë në Kosovë.

Ai ka theksuar se njohja nga CHEA pasqyron përkushtim të fuqishëm ndaj cilësisë akademike, integritetit institucional, transparencës dhe përmirësimit të vazhdueshëm.

Presidenti i CHEA-s ka vlerësuar se njohja e AKA-së ka rëndësi të veçantë, pasi pasqyron punën shumëvjeçare të përkushtuar për forcimin e sigurimit të cilësisë në arsimin e lartë në Kosovë dhe në rajonin më të gjerë.

Sipas tij, arsimi i lartë është gjithnjë e më global, ndërsa studentët, kërkimi shkencor dhe inovacioni kalojnë kufijtë kombëtarë. Për këtë arsye, sigurimi i cilësisë dhe akreditimi kanë një rol shumë të rëndësishëm ndërkombëtar.

Në këtë kontekst, Paydar ka theksuar se organizata si Agjencia e Kosovës për Akreditim kanë rol jetik në ndërtimin e besimit publik dhe në mbështetjen e institucioneve të arsimit të lartë për të përmbushur standarde të larta, duke vazhduar njëkohësisht të zhvillohen dhe të inovojnë.

Ai ka nënvizuar se CHEA beson se organizatat e forta dhe të pavarura të sigurimit të cilësisë janë thelbësore për të ardhmen e arsimit të lartë në mbarë botën.

Në përmbyllje, Presidenti Paydar ka uruar edhe një herë Agjencinë e Kosovës për Akreditim për këtë arritje të rëndësishme dhe ka shprehur pritjen për vazhdimin e bashkëpunimit dhe miqësisë në vitet në vijim.

Video mesazhi i Presidentit Paydar