Stafi i Agjencisë së Kosovës për Akreditim (AKA) organizoi një ceremoni falënderimi për profesoreshën Hasnije Ilazi, me rastin e përfundimit të mandatit të saj pesëvjeçar si kryetare e Këshillit Shtetëror të Cilësisë (KSHC). Në shenjë mirënjohjeje për kontributin e saj të jashtëzakonshëm në udhëheqjen dhe avancimin e sistemit të sigurimit të cilësisë në arsimin e lartë, KSHC-ja dhe AKA-ja e kanë zgjedhur prof. Ilazin Presidente Nderi.

Gjatë mandatit të prof. Ilazit në krye të KSHC-së, Agjencia e Kosovës për Akreditim shënoi arritje të rëndësishme në fuqizimin e sistemit të sigurimit të cilësisë në arsimin e lartë. Këto rezultate kulmuan me regjistrimin e AKA-së në Regjistrin Evropian për Sigurimin e Cilësisë në Arsimin e Lartë (EQAR), si dhe me njohjen nga Këshilli për Akreditimin e Arsimit të Lartë (CHEA) në Shtetet e Bashkuara të Amerikës.

Në fjalën e saj, kryetarja Ilazi falënderoi stafin e AKA-së për punën profesionale, bashkëpunimin korrekt dhe përkushtimin e treguar gjatë këtyre viteve, duke theksuar se rezultatet e arritura janë produkt i punës së përbashkët dhe i përkushtimit institucional për avancimin e cilësisë në arsimin e lartë.

Prof. Ilazi tha se AKA-ja tashmë është një agjenci me kredenciale evropiane dhe amerikane, falë punës së përbashkët, përmbushjes së objektivave strategjike dhe angazhimit të vazhdueshëm për zbatimin e standardeve ndërkombëtare të sigurimit të cilësisë.

Drejtori i Përgjithshëm i AKA-së, Naim Gashi, tha se Agjencia ka krijuar një traditë të vlerësimit të personaliteteve që kanë dhënë kontribut të rëndësishëm në zhvillimin institucional të AKA-së dhe në ngritjen e cilësisë në arsimin e lartë në Republikën e Kosovës.

Ai theksoi se prof. Hasnije Ilazi është shembull i profesionalizmit, përkushtimit dhe lidershipit në udhëheqjen e një institucioni publik, jo vetëm në Republikën e Kosovës, por edhe më gjerë.

Drejtori Gashi, në emër të stafit të AKA-së, e falënderoi prof. Ilazin për kontributin e saj shumëvjeçar dhe për rolin e rëndësishëm në avancimin e Agjencisë drejt standardeve më të larta evropiane dhe ndërkombëtare të sigurimit të cilësisë.

Nga data 18 qershor 2026, kryetar i Këshillit Shtetëror të Cilësisë është zgjedhur prof. Avni Berisha.